मुंबई 18 फेब्रुवारी 2026
बारामती येथे झालेल्या विमान अपघाताप्रकरणी आमदार रोहित पवार यांनी आज घेतलेल्या पत्रकार परिषदेत खळबळजनक खुलासे केले आहेत. हा अपघात नसून ‘घातपात’ असण्याची दाट शक्यता असल्याचे सांगत, त्यांनी विमान कंपनीचे मालक, डीजीसीए (DGCA) आणि काही राजकीय नेत्यांच्या संबंधांवर गंभीर आरोप केले आहेत. या प्रकरणाच्या पारदर्शक तपासासाठी सीबीआयसह (CBI) आंतरराष्ट्रीय संस्थांची मदत घेण्याची मागणी त्यांनी केली आहे.
विमानात अतिरिक्त इंधन आणि घातपाताची शंका
रोहित पवार यांनी दावा केला की, अपघाताच्या वेळी विमानात विहित मर्यादेपेक्षा जास्त इंधन होते. “विमानाचे पंखे इंधनाने पूर्ण भरलेले असतानाही आतमध्ये अतिरिक्त इंधन कॅन ठेवण्यात आले होते. हे कॅन टॉयलेटजवळ म्हणजेच ब्लॅक बॉक्सच्या जवळ होते,” असे त्यांनी सांगितले. विमानाचा वेग कमी असतानाही मोठा स्फोट होण्याचे मुख्य कारण हेच अतिरिक्त इंधन असल्याचे त्यांनी नमूद केले. यामागे वैमानिकाचा वापर करून जाणीवपूर्वक घातपात घडवून आणला असावा, अशी शंका त्यांनी व्यक्त केली.
विमान कंपनी आणि तांत्रिक त्रुटींवर बोट
VSR व्हेंचर्स या कंपनीच्या कारभारावर प्रश्नचिन्ह उपस्थित करताना रोहित पवार म्हणाले की, सदर विमानाची नोंदणी बेकायदेशीरपणे करण्यात आली होती. “डीजीसीएच्या नियमानुसार सीव्हीआर (CVR) रेकॉर्डिंग दोन तासांचे असणे आवश्यक आहे, तसेच, विमानाचे इंजिन 5 हजार तासांची मर्यादा संपवून 8 हजार तास चालले होते आणि विमानाच्या मॉडेलची माहितीही तपास अहवालात चुकीची दिल्याचे त्यांनी निदर्शनास आणून दिले.
इन्शुरन्स आणि आर्थिक हितसंबंध
या घटनेमागे मोठा आर्थिक व्यवहार असण्याची शक्यता व्यक्त करताना रोहित पवार यांनी इन्शुरन्सचा मुद्दा मांडला. “ज्या विमानाची किंमत जेमतेम १० ते १५ कोटी होती, त्याचा लायबिलिटी इन्शुरन्स २१० कोटी रुपयांचा होता,” अशी माहिती त्यांनी दिली. वैमानिक सुमित कपूर याला वैयक्तिक अडचणींमुळे ब्लॅकमेल करून हा घातपात घडवला गेला का, याचा तपास होणे गरजेचे असल्याचे त्यांनी सांगितले.
राजकीय संबंध आणि तपासातील अडथळे
VSR व्हेंचर्सचे मालक आणि त्यांचा मुलगा रोहित सिंग यांचे सत्ताधारी पक्षातील नेत्यांशी जवळचे संबंध असल्याचा दावा पवारांनी केला आहे. तसेच, अपघातानंतर कंपनीचा मालक भारतातून मायामीला कसा गेला, असा सवालही त्यांनी उपस्थित केला.
सोशल मीडिया ट्रोलिंग आणि सुरक्षा
तपास भरकटवण्यासाठी भाजप पुरस्कृत ट्रोलर्स आपल्याला लक्ष्य करत असल्याचे रोहित पवार यांनी सांगितले. “माझा आधार कार्ड डेटा आणि विमान प्रवासाची गुप्त माहिती एका विशिष्ट ट्रोलरकडे कशी पोहोचते?” असा सवाल त्यांनी एअरपोर्ट अथॉरिटीवर (AAI) उपस्थित केला. या प्रकरणातील एका ट्रोलरने अपघाताच्या दोन दिवस आधी ‘पुढील दोन दिवसात मोठा भूकंप’ होणार असल्याचे ट्विट करून डिलीट केल्याचा दावाही त्यांनी केला.
तपासासाठी नवीन समितीची मागणी
पवार यांनी या प्रकरणासाठी केवळ सीबीआय किंवा सीआयडीवर अवलंबून न राहता एक उच्चस्तरीय मॉनिटरिंग समिती स्थापन करण्याची मागणी केली आहे. यात देशाचे विरोधी पक्षनेते, निवृत्त न्यायाधीश आणि अजित पवार यांच्या पक्षाच्या सदस्यांचा समावेश असावा, जेणेकरून तपासात पारदर्शकता राहील, असं त्यांनी स्पष्ट केले.
पार्श्वभूमी
२८ तारखेला बारामती येथे झालेल्या विमान अपघातात अजित पवार यांचा मृत्यू झाल्याच्या संदर्भात ही पत्रकार परिषद होती. रोहित पवार यांनी गेल्या २० दिवसांपासून या प्रकरणाचा तपास करून ही माहिती जमा केल्याचे सांगितले आहे.
पुढे काय?: रोहित पवार यांनी या प्रकरणातील तांत्रिक पुरावे आणि डिजिटल माहिती नष्ट होऊ नये म्हणून ती सुरक्षित ठिकाणी ठेवल्याचे सांगितले आहे. आगामी अधिवेशनातही हा मुद्दा लावून धरण्याचे संकेत त्यांनी दिले आहेत.